Yerai Martin: "Humiltasuna eta lana gakoa izan dira lortzen ari garen guztia lortzeko"

Real Madrid CFren aurkako partidaren atarikoan eskainitako prentsaurrekoan (bihar jokatuko da, Ipuruan, 18:30ean), Yerai Martin entrenatzaileak taldearen lanarekin harro eta konfidantzaz dagoela adierazi du, nahiz eta biharkoa "oso partida zaila" izango dela aurreikusten duen.

Talde merengea partida bakar bat ere galdu gabe iritsiko da Eibarrera, Eibarrek lehen itzulia ixteko urtarrilean bisitatu zuenetik. Talde armagina sailkapenean eroso samar, entrenatzaileak aurreikusi duenez, "disfrutatzeko eta lehiatzeko partida izango da, beti ez baita Real Madrid CF bezalako talde bat Ipuruara etortzen". Izan ere, talde bisitariak ez du partida bakar bat ere galdu denboraldi honetan etxetik kanpo.

25. jardunaldira osasun onarekin iritsi diren arren, bi taldeek nazioarteko partidak jokatu dituzten jokalariak izan dituzte, "eta hori kontuan hartu beharko da deialdia eta partida planifikatzeko orduan". "Real Madrid CF asko ari da hazten, baina gu ere bai, begira non gauden eta zein talderekin lehiatzeko gai garen", gaineratu du, "nahiz eta, egia esan, oso partida zaila izango dugu bihar".

Taldearen lan orokorrari dagokionez, entrenatzailea "pozik eta harro" agertu da "egindako lan guztiarekin" eta denboraldi honetan lortutako gauza guztiekin, "Di Stéfanon edo Lezaman lortutako garaipenetik hasita, apirilean jarraian lortutako lau garaipenetaraino; gauza asko normaltasunez hartzen ditugu, baina errealitatea da lortu dugun guztia ez dela normala". Eta gaineratu du garrantzi handia duela, batez ere, taldeak momentu txar eta onetan batuta mantentzea.