![](https://statics-maker.llt-services.com/eib/images/2022/12/04/xlarge/e88f0e6c-62ee-4ca2-ba36-32fbb580249e.jpg)
Huts egindako penalti batek eta zorigaiztoko jokaldi batek Eibarri merezi zituen hiru puntuak galarazi dizkio
Atsedenaldia baino lehentxeago Sergi Enrichek sartutako gola berdindu zuen Juncak bere atean. Saulek penalti bat huts egin zuen bat eta hutsekoarekin
Eibarrek hiru puntuak merezi zituen partida guztian nagusi izan eta gero. Valenciak ez zion inolako arazorik sortu armaginen atezainari, eta gola David Juncak sartu zuen bere atean zorigaiztoko jokaldi batean 85. minutuan. Domenech atezaina izan zen valentziarren heroia.
Vila-Realen bezalaxe, Eibarrek ez zuen penaltia probestu 1-0 irabazten zihoanean eta bi puntu galdu zituen partida-amaieran. Kaltegarriak ari dira izaten partiden azken uneak Eibarrentzat. Aurreko igandean ere puntu bat galdu zuen Realaren kontra Anoetan.
Mendilibarren mutilek partida oso ona egin zuten eta Valenciari argi eta garbi nagusitu zitzaizkion, batik bat lehen zatian. Gol aukera asko izan zituzten eta Saul aurrena eta Keko Gontán gerora eztenak bezala barneratu ziren bi hegaletatik.
- minutuan Borja Bastónek gola egiteko aukera izan zuen Kekoren pasea jaso eta gero, baina Mustafi aurreratu egin zitzaion jaurtitzera zihoanean. Hurrengo jokaldian, Sergik gola oso gertu izan zuen, baina azken uneko Domenechen geldiketak eta zutoinak baloia barrura sartzea eragotzi zuten.
Lehen zatia 0-0 berdinketarekin amaituko zela zirudienean iritsi zen etxekoen gola. Keko eta Ander Caparen arteko jokaldi zoragarri bat eta gero, azken horrek Sergi Enrichi pasatu zion baloia, ate ondotik gola egin zezan. Lehen denboran jaun eta jabe izan zen Eibar, eta bere konbinaziozko joko azkarrak sari handiagoa merezi zuen.
Atsedenaldiaren ondotik, Valencia partidaren kontrola eskuratzen saiatu zen baina Eibarrek gogor eutsi zien, gol aukera bakar bat ere egiten utzi gabe.
Garaipena ziurtatzeko unea iritsi zen 65. minutuan, epaileak etxekoen aldeko penaltia adierazi eta Orbán kaleratu zuenean, area barruan Dani Garcíak buruan kolpe bat jaso eta gero. Penaltia Saulek bota zuen, baina Domenechek asmoa asmatu eta baloia gelditu zuen. Borjak alderatzea hartu eta jaurti zuen, baina baloia kanpora joan zen.
Jokalari bat gutxiago zuen Valenciak, eta saiatu arren ezin zuen Eibarren eskema hautsi. Etxekoen garaipena gertu zegoela zirudien.
Alabaina, 85.minutuan, oso suerte txarreko jokaldi batean baloiak sarean bukatu zuen, David Juncak, baloia aldentzeko ahaleginetan, bere aterantz bota eta gero. Valenciak berdinketa lortu zuen partida guztian arriskuko jokaldi bakar bat ere sortu ez arren.
Luzapeneko denboran Iván Ramisek txartel gorria ikusi zuen, Paco Alcarren kontraeraso bat gelditzeko falta egin eta gero. Falta-jaurtiketak eman zion amaiera Eibarrek irabaztea merezi izan zuen partida honi.