75. urteurrenaren liburua salgai
Talde armaginaren ibilbidea laburbiltzen duen liburua aurkeztu zuten atzo Coliseo antzokian, eta gaurtik aurrera eskura daiteke
Salgai dago 75. urteurrenaren liburua, hainbat tokitan: Eibarreko Yralagoitia liburu dendan eta Askasibarren eta Euskal Herri osoko Eroski hipermerkatuetan, El Corte Inglés zentroetan eta Elkar dendetan. Halaber, Internet bidez ere eros daiteke hurrengo webgune hauetan: eibarstore.com eta amazon.es. Talde armaginaren 75. urteko ibilbidea jasotzen duen 208 orrialdeko liburuak 150 argazki biltzen ditu eta 26 euroren truke eskura daiteke. SD Eibar Fundazioak argitaratu du, eta 1940an kluba sortu zenetik aurrerako historia ez ezik, futbola Eibarrera 1911n heldu zenetik aurrerakoa ere biltzen du.
Atzo aurkeztu zuten Coliseo antzokian, gala hunkigarri batean, liburuan agertzen diren protagonistetako askori egindako elkarrizketen eta haiek azaldutako bizipenak erakusten zituzten bideoekin.